Klopp kritiserer Anfield-stemninga: – Gi billetten din til nokre andre

Sjølv om Liverpool leverte festfotball i 5-1-sigeren over West Ham, er manager Jürgen Klopp misfornøgd med stemninga på tribunen.

Publisert: 21.12.2023 kl 07:38

Liverpool sikra plass i semifinalen i ligacupen med storsigeren på eige gras onsdag. Etter kampen hadde Klopp ein beskjed til eigne supporterar.

– Eg var ikkje særleg fornøgd med lydnivået bak meg då laget spelte veldig bra. Vi dominerte West Ham og skapte sjansar. Viss eg hadde vore på tribunen hadde eg stått på tærne, sa Klopp på pressekonferansen.

Liverpool har nyleg opna ein ny tribunedel som gjer at 57.000 kjem inn portane.

Når Arsenal kjem på besøk til toppkamp i Premier League laurdag, ønskjer Klopp meir frå publikum.

– Vi treng støtta frå Anfield frå første sekund. Viss du ikkje kan eller ønskjer å bidra, gi billetten din til nokre andre, avslutta han.

Arsenal leier ligaen med eitt poeng ned til Liverpool og Aston Villa. Det betyr at sistnemnde faktisk mellombels tek over ligatoppen om dei slår botnlaget Sheffield United fredag.

(©NPK)

Jürgen Klopp meiner lydnivået på Anfield må opp før toppkampen mot Arsenal. Foto: Jon Super / AP / NTB