Kong Salman skryter av Saudi-Arabias rettsvesen
Saudi-Arabias kong Salman skrytte av rettsvesenet i landet i den første talen sin etter drapet på journalisten Jamal Khashoggi.
Sjølve drapet vart ikkje nemnt i talen til kongen måndag. Men han roste den saudiarabiske påtalemakta, som har slege fast at Khashoggi vart drepen, og at det kjem til å bli lagt ned påstand om dødsstraff for fem av dei sikta i saka.
- Vi er stolte av innsatsen til rettsvesenet og påtalemakta, sa Salman i talen til det saudiarabiske Shura-rådet.
Saudi-Arabia har eit strengt islamistisk styresett, og den 82 år gamle monarken lova at landet vil «setje i verk Guds lov».
Den saudiarabiske journalisten, regimekritikaren og tidlegare regjeringsrådgjevaren Jamal Khashoggi vart drepen inne på konsulatet i landet i Istanbul i Tyrkia. Saudi-Arabia avviste lenge at drapet hadde skjedd, men innrømde det til slutt.
Påtalemakta meiner saudiarabiske agentar drap Khashoggi utan å ha fått klarsignal frå høgare hald. Kritikarar av regimet i landet og kjelder i den amerikanske etterretningsorganisasjonen CIA meiner likevel at kronprins Mohammed i Saudi-Arabias må ha gjeve ordre om drapet.
Faren til kronprinsen, kong Salman, skrytte måndag av innsatsen til sonen for å styrkje økonomien i landet og skape arbeidsplassar for saudiarabisk ungdom.
(©NPK)
Kong Salman talte måndag til det saudiarabiske Shura-rådet. Foto: Saudi Press Agency / AP / NTB scanpix