Lagerbygg får Noregs største solcelleanlegg

(NPK-NTB): NorgesGruppen har bestemt seg for å montere solceller for 23 millionar kroner på eit lagerbygg i Våler. Anlegget blir det største i Noreg.

npk@npk.no

Publisert: 04.05.2016 kl 15:13

Anlegget skal stå ferdig innan utgangen av året og vil dekke 25 prosent av energibehovet til bygget, opplyser NorgesGruppen.

Det er Norgesgruppens dotterselskap Unil som gjennomfører prosjektet. Satsinga skjer i samarbeid med Storebrand Asset Management, som eig bygget. Sjølve solcellepanela skal leverast av FUSEN.

– Vi skal kle tak og vegger med solcellepanel som skal gi oss fornybar energi. Dette er i tråd med Norgesgruppens ambisiøse miljøsatsing, seier Jarle Kjelingtveit i Unil.

Solcellepanela vil dekke om lag 8.000 kvadratmeter.

Tidlegare har NorgesGruppen bygd 2.500 kvadratmeter med solceller på ASKOs lager i Vestby og 4.500 kvadratmeter hos ASKO Agder. Anlegget i Vestby skal seinare utvidast til 10.000 kvadratmeter. (©NPK)