Lagmannsretten avviser Snowdens anke

(NPK-NTB): Borgarting lagmannsrett har avvist å behandle spørsmålet om Edward Snowden kan komme til Noreg utan fare for å bli utvist til USA.

npk@npk.no

Publisert: 28.09.2016 kl 11:57

Domstolane har ikkje sakleg kompetanse til å førehandsprøve spørsmålet i ein sivil sak, skriv retten.

Borgarting lagmannsrett stiller seg dermed bak avgjerda frå Oslo tingrett i juni og argumenta frå staten om at dei ikkje kan behandle kravet frå Snowden før det ligg føre ei utleveringsoppmoding frå USA.

Bakgrunnen for ønsket om ein garanti for at Snowden ikkje vil bli utlevert frå Noreg til USA er at Snowden den 18. november i år skal ta imot Ossietzky-prisen som organisasjonen PEN delar ut i Noreg. Snowden er for tida i Russland.

Oslo tingrett skrev i si avvisning i juni at ei førehandsprøving vil kunne undergrave det internasjonale straffesakssamarbeidet som utleveringslova byggjer på.

Domstolen meiner det er umogleg å ta stilling til om ei utlevering til USA vil vere ulovleg før det ligg føre ei oppmoding frå amerikanske styresmakter.