Landslagshoppar gjennom ny kneoperasjon
Skihoppar Thomas Aasen Markeng (20) blir ikkje å sjå under NM i Oslo i helga. Totningen har igjen hatt eit inngrep i kneet.
Det var i desember i fjor at korsbandet i venstrekneet rauk for Markeng. Han øydela òg menisken i det same fallet i Klingenthal i Tyskland, men kom overraskande raskt tilbake frå skadeavbrekket.
No har han bestemt seg for at det blir mindre hopping i vinter. Nyleg fekk han gjort ein mindre operasjon. Han deltek derfor ikkje i NM i liten bakke i Midtstubakken denne helga.
– Eg har fjerna ein skrue og litt vev i kneet. Håpet er at eg skal vere tilbake i bakken når snøen kjem, seier Markeng til NRK.
20-åringen legg til at det er lite truleg at han hoppar alle verdscuphelgane i 2020/2021-sesongen.
– Eg er framleis ung, og det kjem eit OL neste år.
(©NPK)
Thomas Aasen Markeng har vore gjennom ein ny operasjon i venstrekneet. Foto: Geir Olsen / NTB