Le Pen bøtelagd for holocaust-kommentar

(NPK-NTB): Den tidlegare leiaren for det ytterleggåande høgrepartiet Nasjonal Front i Frankrike, Jean-Marie Le Pen, er på nytt bøtelagd for utsegn han har kome med om holocaust.

Den 87 år gamle tidlegare partileiaren har blant anna kalla gasskammera til nazistane, der millionar av jødar og andre blei utrydda, for «ein detalj» i historia om andre verdskrigen.

Ein fransk domstol fann han onsdag skuldig i å fornekte brotsverk mot menneska, noko som er straffbart i Frankrike, melder BBC.

Domstolen gav han derfor ei bot på 30.000 euro, drygt 284.000 kroner.

Jean-Marie Le Pen fekk ein tilsvarande dom i 2012, etter å ha hevda at nazi-okkupasjon av Frankrike under andre verdskrigen «ikkje var særleg inhuman». (©NPK)

Annonse