Legemiddelgigant vil endre gatenamn i Oslo

Ifølgje E24 skal selskapet flytte frå lokala i Nycoveien 2 til nye lokale i Nycoveien 1. I eit brev til kommunen føreslår selskapet at det blir laga nye gatenamn.

– GE Healthcare føreslår derfor ei namneendring, slik at ein liten, ikkje-namngitt veg ved deira nye lokale blir gitt namnet Nycoveien, medan Nycoveien blir gitt eit nytt namn, til dømes Kontrastveien, heiter det i saksframstillinga. Førespurnaden fell ikkje i god jord hos Mats Kirkebirkeland (H) i Sagene bydelsutval.

– Som Høgre-mann er eg jo positiv til næringsliv. Men dette tek kaka. Det får vere grenser for kor mykje vi skal legge til rette for private aktørar, seier han.

Administrerande direktør i GE Healthcare forklarer førespurnaden med at selskapet har produkt registrert i fleire enn 100 land med dagens adresse. I tillegg må pakningsvedlegga til alle produkta skiftast ut.

– Det dreier seg om eit millionbeløp, og det var grunnen til at vi i november 2015 starta dialogen med lokale styresmakter for å sjå på forskjellige moglegheiter i fellesskap, seier Fuglaas.

Forslaget skal no behandlast av bydelsutvalet. (©NPK)