Leiaren for universitet i Hongkong seier at situasjonen er ute av kontroll

I eit ope brev seier universitetspresident Rocky Tuan at han kan bli nøydd til å be regjeringa rydde opp dersom ikkje universitetet kan operere som normalt. Han beskriv situasjonen som uakseptabel og ute av kontroll.

For tre dagar sidan vart det utkjempa eit gateslag mellom politi og demonstrantar på universitetsområdet. Politiet fyrte av over 1.000 tåregassgranatar, og fleire brannar braut ut.

No åtvarar Rocky Tuan om at bensinbomber og gatesteinar igjen blir lagra inne på området.

Inga krigssone

- Universitetet er ein stad for kunnskap, inga krigssone. Det er heller ikkje ein stad for å lage våpen og utøve makt, legg han til.

Inngangen til det kinesiske universitetet er kontrollert av demonstrantane, og leiinga har avlyst all undervisning for resten av året. Demonstrantane har òg blokkert resten av universiteta i den tidlegare britiske kronkolonien.

Demonstrantane er i hovudsak yngre studentar som krev demokratiforsikringar og gransking av det dei kallar politivald.

Blokkert

Ved det kinesiske universitetet vart Tolo Highway òg stengd, ein av dei største gjennomfartsårene i byen.

Fredag morgon vart eitt felt opna som eit teikn på god vilje, som det vart sagt. Heile vegen vil bli opna dersom regjeringa forsikrar at lokalvalet blir halde som planlagt, ifølgje demonstrantane. Denne forsikringa kom ikkje, og fredag kveld vart motorvegen igjen heilt blokkert.

Den anstrengde stemninga breier seg til utlandet, og torsdag kveld vart Hongkongs justisminister omringa av rasande demonstrantar under eit besøk i London. I tumultane vart ministeren riven over ende og skadd i armen, viser videoopptak av hendinga.

Ho skulle halde ei forelesing som vart avlyst etter episoden. Ingen personar er arresterte.

(©NPK)

Alle universiteta i Hongkong blir blokkerte av demonstrantar. Leiaren for det kinesiske universitetet vurderer å be styresmaktene rykkje inn og rydde opp.
Foto: AP/NTB scanpix