Leiaren i MGP-klubben: – Teigen var Grand Prix-kongen over alle
Jahn Teigen var årsaka til at Melodi Grand Prix har vorte så stort i Noreg som det er, meiner leiaren i den norske MGP-klubben, Morten Thomassen.
– I mine auge var han Grand Prix-kongen over alle. Rybak og Bobbysocks vann internasjonalt, men det var Teigen som gjorde Grand Prix stort, seier Thomassen til NTB.
Jahn Teigen deltok i Melodi Grand Prix heile 14 gonger. Første gong i 1974 med låten «Hvor er du?", som vann finalen. Teigen representerte òg Noreg i Eurovision Song Contest tre gonger til, i 1978, 1982 og 1983. Mest kjent er han for deltakinga i 1978, då han enda heilt sist med null poeng. Men Teigen klarte å snu situasjonen, og låten vart ein salssuksess.
– Måten han takla det på, viser berre ei herleg innstilling til livet, kva som er viktig og ikkje, seier Thomassen.
MGP-eksperten meiner at vi med Teigens bortgang har mista ein av dei største popstjernene våre.
– Han er den største vi kanskje vil få nokosinne, seier han.
(©NPK)