Leipzig-spelar testa positivt på korona timar før meisterligakamp
RB Leipzigs midtbanespelar Amadou Haidara fekk tysdag påvist koronasmitte etter først å ha avlagt ein test som ikkje gav tydeleg svar.
Testsvaret kom berre timar før det tyske laget opnar Meisterligaen i år med heimekamp mot Basaksehir frå Tyrkia. Haidara er rett nok ikkje i kamptroppen, sidan han har vore isolert frå resten av laget sidan torsdag på grunn av den førre testen.
Dermed spelte han heller ikkje i seriekampen mot Augsburg i helga.
– Vi held kontakten med Amadou Haidara. Han har det bra etter forholda, og han har ingen sjukdomssymptom. Han får all støtta han treng frå oss, og vi forventar å ha han tilbake snart, seier sportsdirektør Markus Krösche i Leipzig.
Alle andre Leipzig-spelarar, blant dei Alexander Sørloth, har testa negativt på koronaviruset i forkant av meisterligaopninga.
(©NPK)
Amadou Haidara (til h.) er smitta av koronavirus. Foto: Michael Sohn / AP / NTB