Likestillingsombodet: – For få kvinner i forsvarsleiinga

– Det er for svak representasjon. Eg er heilt overbevist om at Forsvaret kunne hatt fleire kvinner i toppleiinga, seier Lier Haugseth til NRK.

Organisasjonskartet til Forsvaret viser at det er 26 menn og éi kvinne i toppleiinga.

Forsvarssjef Haakon Bruun-Hanssen seier til kanalen at kvinnedelen i toppleiinga speglar kor mange kvinner det er i Forsvaret totalt, og at han vil ha dei beste leiarane uavhengig av kjønn.

– Vi får like mange kvinner gjennom dette systemet som vi får menn. Prosentvis er fordelinga mellom kvinner og menn nokolunde lik frå dei unge i 20 til 30-åra til alderen dei har når dei er i toppleiinga, seier Bruun-Hanssen

– Forsvaret er ein kjempestor arbeidsgjevar som sysselset rundt 17.000 menneske totalt. Og det er ei sjølvfølgje at det skal vere ein betre representasjon av kvinner i toppleiinga i Forsvaret også, svarar Lier Haugseth. (©NPK)