Også Norgesgruppen stadfestar besøk av Konkurransetilsynet
Konkurransetilsynet undersøkjer Lilleborg AS for moglege brot på konkurransereglane. Også Norgesgruppen har fått besøk, stadfestar daglegvaregiganten.
Tysdag gjennomførte Konkurransetilsynet fleire umelde kontrollar i daglegvarebransjen.
Orkla-selskapet Lilleborg AS blir undersøkt fordi tilsynet har mistankar om at dei har brote konkurranselova, opplyste Orkla i ei børsmelding.
No stadfestar også Norgesgruppen at tilsynet har vore hos dei, ifølgje Dagens Næringsliv.
- Får informasjonen dei ber om
- Norgesgruppen har til liks med dei andre kjedene i lengre tid hatt tett dialog med Konkurransetilsynet om vilkåra til leverandørane. Vi kan stadfeste at tilsynet har vore hos oss i dag for å få meir informasjon, skriv direktør for næringspolitikk og styresmaktskontakt Bård Gultvedt i Norgesgruppen i ei melding til avisa.
Norgesgruppen er det største daglegvarekonsernet i landet og står bak butikkar som Kiwi, Meny og Spar.
- Konkurransetilsynet får naturlegvis den informasjonen dei ber om. Norgesgruppen jobbar kontinuerleg med sikte på å ha så gode innkjøpsvilkår som mogleg, slik at vi kan tilby kundane våre låge prisar, skriv Gultvedt vidare.
Held pressekonferanse
- Formålet med bevissikringa er å få stadfesta eller avkrefta mistanke om brot på konkurranselova, seier avdelingsdirektør Beate Milford Berrefjord i Konkurransetilsynet i ei pressemelding.
Tilsynet har varsla pressekonferanse om saka onsdag.
Dei har over tid arbeidd med å kartleggje innkjøpsvilkåra i daglegvaremarknaden. Resultata av kartlegginga skulle etter planen offentleggjerast 20. november.
- På grunn av den merksemda bevissikringa no har fått, vil Konkurransetilsynet i staden presentere resultata på ein pressekonferanse, opplyser dei.
Konkurransetilsynet har mistankar om at Lilleborg AS har brote innkjøpsvilkåra mellom leverandørar og daglegvarekjedene.
- Har ikkje gjort noko gale
Lilleborg AS er eigd av Orkla og står bak varemerke som mellom anna Jif, Omo og Zalo.
Lilleborg samarbeider med Konkurransetilsynet for å sørgje for ei effektiv gjennomføring av undersøkinga, skriv Orkla i børsmeldinga.
Tilsynet kom tidleg tysdag formiddag, opplyser kommunikasjonsdirektør Håkon Mageli i Orkla til DN.
- Vi meiner vi ikkje har gjort noko gale, seier Mageli til avisa.
(©NPK)
Konkurransetilsynet har vore på besøk hos Norgesgruppen. Foto: Trond Reidar Teigen / NTB scanpix
Illustrasjonsfoto: Fredrik Varfjell / NTB scanpix
Konserndirektør for kommunikasjon i Orkla, Håkon Mageli, på NHOs årsmiddag.
Foto: Heiko Junge / NTB scanpix