LO-topp opnar for å endre aldersgrensa for LO-leiarar
Eldreombod Bente Lund Jacobsen ber LO auke aldersgrensene for leiarane sine. LO-topp Mette Nord gir dei same signala, skriv VG.
Torsdag vil LOs representantskap velje Peggy Hessen Følsvik som ny leiar fram til kongressen våren 2022.
Etter dagens vedtekter kan ingen blir valde inn i LOs leiing etter at dei har fylt 60 år. Følsvik fylte 60 i november i fjor og vil ikkje vere valbar neste år om ikkje aldersgrensene blir endra.
Eldreombod Bente Lund Jacobsen meiner LO bør auke aldersgrensa for leiarane sine frå 60 til 65 år.
– Det er umusikalsk og umoderne at Noregs største arbeidstakarorganisasjon har ei slik tilnærming i ei så viktig sak, seier Jacobsen til VG.
Leiar Mette Nord i Fagforbundet signaliserer at dei meiner det vil vere riktig å endre aldersgrensa.
– Vi er positiv til å endre; anten å fjerne aldersgrensa heilt eller å auke ho. Når aldersgrensene i resten av samfunnet blir auka og vi må stå lenger i jobb, er det naturleg at også LO ser på aldersgrensene sine, seier Nord.
Fleire LO-forbund har teke initiativ til at aldersgrensa i forbunda deira blir auka, mellom anna har Handel og kontor innført 62-årsgrense og det største forbundet i privat sektor, Fellesforbundet, har 63 års aldersgrense.
(©NPK)
Leiar i Fagforbundet Mette Nord seier dei er positive til å fjerne aldersgrensa heilt eller å auke den. Foto: Gorm Kallestad / NTB / NPK