Lyngdal kommune melder brot på smittevernreglar

Lyngdal kommune opplyser at dei torsdag vedtok konsekvent å politimelde alle avdekte brot på covid-19-forskrifta. Fredag ettermiddag vart den første meldinga skriven ut, opplyser kommunen i ei pressemelding fredag.

Der kjem det fram at meldinga er knytt til det siste smittetilfellet i Lyngdal, der ein person med bustadadresse ein annan stad i landet valde å reise til Lyngdal etter heimkomst frå utlandet.

«Denne personen overholdt ikke 24-timers regelen for testing, og har i tillegg heller ikke overholdt karantene-bestemmelsene ved innreise til Norge» står det i meldinga.

«Etter å ha fått positivt resultat på første test, som ble tatt ved luftveisklinikken i Lyngdal, ble heller ikke isolasjonsbestemmelsene overholdt» skriv kommunen.

No risikerer vedkommande ei klekkeleg bot.

– Eg kan ikkje uttalte meg konkret om denne saka, men ein vanleg reaksjon på brot på karanteneavgjerdene er normalt 20.000 kroner, seier operasjonsleiar ved Agder politidistrikt, John Repstad, til Fædrelandsvennen.

(©NPK)

Lyngdal kommune har meldt ein person til politiet for brot på innreise- og karantenereglane. Foto: Tor Erik Schrøder / NTB