Mange døydde i trengsel nær konsulat i Afghanistan
Minst 15 personar omkom og mange vart skadde då det braut ut trengsel på ein open plass ved Pakistans konsulat i byen Jalalabad i det austlege Afghanistan.
Fleire tusen menneske hadde samla seg tysdag for å få tak i kupongar for å søkje visum for å reise til Pakistan, seier styresmakter til nyheitsbyrået Reuters.
Av uklare årsaker oppstod det panikk i folkemassen, og mange menneske vart trampa ned.
Til TV-kanalen Al Jazeera uttalte ein lokalpolitikar at minst elleve av dei omkomne var kvinner, og fleire eldre vart òg skadde.
Den pakistanske ambassaden har førebels ikkje kommentert hendinga.
(©NPK)