Minst 50 redda ut av brennande bygning i Mumbai - mange framleis fanga
Mange menneske er framleis innesperra i eit brennande høghus i Mumbai i India. Bygningen husar mellom anna kontora til eit statseigd teleselskap.
Minst 50 menneske vart måndag ettermiddag redda ut av bygningen. 16 brannbilar og 200 brannfolk deltar i arbeidet med å sløkke brannen og evakuere folk som ikkje har greidd å komme seg ut.
Den ni etasjar høge bygningen ligg i Bandra-området i Mumbai.
Indisk fjernsyn har vist bilde av menneske som knuser vindauge og som vinkar til brannfolka for å bli evakuert.
- Brannen har ramma andre, tredje og fjerde etasje. Vi har så langt redda 50 menneske, seier ein tilsett i brannvesenet.
- Vi har ikkje det nøyaktige talet, men brannen har tvinga mange menneske til å søke tilflukt på terrassen. Dei bør òg bli frakta i sikkerheit snart, seier han.
Det er førebels ikkje meldt om skadde eller omkomne.
TV-kanalen NDTV anslår at 100 menneske er fanga på terrassen til bygningen, medan kanalen Times Now melder at 50 menneske enno ikkje har komme seg ut.
(©NPK)
Folk ventar på å bli redda ned frå den brennande bygningen i Mumbai. Foto: Rafiq Maqbool / AP / NTB scanpix