Mikkelsen opna med 4.-plass i Rally Argentina

Andreas Mikkelsen var to sekund bak Ott Tänak under den første fartsprøva i Rally Argentina. Dermed er han nummer fire i samandraget før køyringa på fredag.

På regntunge vegar kom Tänak seg raskast gjennom gatene i Villa Carlos Paz. Estlendaren slo Frankrike-stjerna Sébastien Ogier med 1,6 sekund, medan britiske Kris Meeke var bak med ytterlegare 10/100.

- Det blir ei tøff helg med alt dette regnet. Denne fartsprøva var veldig glatt, og det overraska meg. Uansett kom vi frå det med ein feilfri start, tvitra Mikkelsen etter første dag i Rally Argentina.

Hyundai-føraren har totalt vunne tre VM-rundar i karrieren. Den førre kom i Australia i 2016.

Etappen på fredag består av sju fartsprøvar.

(©NPK)

Andreas Mikkelsen er i toppen etter opninga i Rally Argentina. Foto: Micke Fransson / TT / NTB scanpix