Mogleg kvalik-reprise for RBK
Valur på Island kan for andre året på rad bli motstandaren når Rosenborg tysdag får vite kven dei skal møte i første kvalifiseringsrunden til meisterligaen.
RBK er seeda i trekninga i hovudkvarteret til Det europeiske fotballforbundet (UEFA) i Nyon. Dermed er sjansane for overkommeleg motstand gode.
For eitt år sidan vart dei islandske seriemeistrane i Valur Reykjavik første hinderet på vegen mot meisterligaspel, og det same kan bli utfallet igjen. Det treng ikkje bli lett. Fjorårsduellen enda med 3-2-siger samanlagt til Rosenborg.
Ungarske Ferencvaros, rumenske Cluj og polske Piast Gliwice er tre andre klubbar som kan bli trekte mot Rosenborg.
Trønderane slepp samtidig å møte Kristoffer Ajer og Celtic og fleire andre sterke, seeda klubbar.
Både første og andre kvalifiseringsrunden blir trekte tysdag.
Rosenborg må gjennom fire kvalifiseringsrundar for å sikre seg plass i gruppespelet i den gjævaste klubbturneringa i Europa. Skulle det bli exit i kvalifiseringa, ventar ein ny Europa-sjanse i kvalifiseringa til Europaligaen.
RBK kan møte desse i første runden: Sudova Marijampole (Litauen), Valletta FC (Malta), Lincoln Rei Imps (Gibraltar), FK Sarajevo (Bosnia-Hercegovina), FC Santa Coloma (Andorra), Piast Gliwice (Polen), Puynik Yerevan (Armenia), CFR Cluj (Romania), Ferencvaros (Ungarn), Kalju Nomme (Estland), Sutjeska Niksic (Montenegro), Partizani Tirana (Albania), Valur Reykjavik (Island), Linfield Belfast (Nord-Irland), HB Torshavn (Færøyane), Riga FC (Latvia), Saburtalo Tblisi (Georgia), Tre Penne (San Marino), Feronikeli (Kosovo).
(©NPK)
Rosenborg-trenar Eirik Horneland får svar på kven som blir første meisterligamotstandaren, tysdag. Foto: Ole Martin Wold / NTB scanpix