Mosul-offensiv kan tvinge 1 million på flukt

(NPK-NTB-Ritzau): Den venta militæroffensiven for å gjenerobre den nest største byen i Irak, Mosul, kan føre til at opptil éin million menneske blir tvungne på flukt, fryktar Røde Kors.

npk@npk.no

Publisert: 29.07.2016 kl 18:21

Mosul har vore kontrollert av IS dei siste to åra, og irakiske regjeringsstyrkar og regjeringsvennleg milits, støtta av den USA-leidde koalisjonen, planlegg no ein stor militæroffensiv mot millionbyen.

– Situasjonen er uviss, men vi må førebu oss på det verste. Det er eit sannsyn for at kampane vil bli hardare, spesielt i Mosul-området, seier Robert Mardini, direktør for Den internasjonale Røde Kors-komiteen (ICRC) i Midtausten, ifølgje nyheitsbyrået Reuters.

3,4 millionar irakarar lever i dag som internt fordregne i landet sitt, der heile 10 millionar menneske er avhengige av humanitær hjelp. ICRC fryktar at tala vil auke betrakteleg i tida som kjem.

Også Flyktninghjelpen og International Rescue Committee har tidlegare åtvara om at ein offensiv for å gjenerobre Mosul, kan resultere i ei humanitær katastrofe. Dei to organisasjonane har anslått at ein offensiv mot byen vil drive rundt 1,2 millionar menneske på flukt.