Nasa vil sende kvinne til månen

Den amerikanske romfartsorganisasjonen Nasa planlegg den første turen til månen sidan 1972. Denne gongen med både ein mann og kvinne om bord i romfartøyet.

Planen er å bruke 28 milliardar dollar på romprogrammet Artemis, men sjølve romferda er òg avhengig av at Kongressen løyver 3,2 milliardar dollar til eit landingssystem, skriv BBC.

Sjølve måneferda er planlagd gjennomført i 2024. Før den tid skal det gjennomførast fleire testar og flygingar, mellom anna ei umanna flyging rundt månen i 2021, skriv Sky News.

I 2023 skal same romferd gjerast igjen, denne gongen med astronautar om bord. Det skal òg sendast romsondar til månen som del av førebuinga på månelandinga. Og i 2024 kan altså den første kvinna etter planen lande på sørpolen til månen.

(©NPK)