Nei til EU varslar ny Acer-debatt

Nei til EU varslar kamp mot EUs fjerde energipakke. Dei meiner det vil gi Acer endå meir makt.

Stortinget sa i fjor ja til å la Noreg bli med i Acer, trass i heftig politisk debatt og kraftig motstand mot byrået.

22. mai vedtok EUs ministerråd EUs fjerde energimarknadspakke. Denne har dei jobba med sidan 2016, og eitt av dei uttalte måla i pakken er å kople europeisk klimapolitikk med energipolitikken, skriv Klassekampen.

- EUs fjerde energipakke fjernar all tvil om at straumen blir styrt meir og meir av EU. Acer, som var ein del av den tredje energipakken, vil få endå meir makt, seier Nei til EU-leiar Kathrine Kleveland til avisa.

Medlemslanda i EU må implementere den nye energipakken i nasjonalt lovverk innan eitt til to år. Implementeringa av energipakken vil på sikt òg komme opp i Stortinget.

- Med den nye energipakken får Acer som energibyrå fleire oppgåver og meir makt til å skjere gjennom ved usemje. Heilt konkret kan Acer treffe vedtak om kostnadsfordeling, nett-tariffar og opprette samsvarsoffiserar, seier Kleveland.

Ho seier ho er bekymra for om Arbeidarpartiet vil klare å halde løftet dei gav i forkant av Acer-vedtaket dersom Noreg sluttar seg til pakken.

- Ap forsikra i forkant av Acer-vedtaket i Stortinget at Noreg framleis skulle ha full kontroll over alt som har med energisikkerheit å gjere, seier Kleveland.

Aps energi- og klimapolitiske talsperson Espen Barth Eide opplyser til avisa at partiet ikkje har tatt stilling til den nye pakken.

(©NPK)

Nei til EU-leiar Kathrine Kleveland meiner EUs fjerde energipakke inneber at Noreg mister ytterlegare suverenitet til EU. Foto: Håkon Mosvold Larsen / NTB scanpix