Ni flyplassar kan bli stengde fredag

(NPK-NTB): Ni flyplassar kan bli stengde og 30.000 passasjerar ramma same helga som skuleferien startar, om ikkje meklinga for dei tilsette i Avinor og Avinor Flysikring fører fram.

npk@npk.no

Publisert: 15.06.2016 kl 16:50

Meklinga mellom LO Stat og Spekter og YS-Spekter/Delta og Spekter startar torsdag klokka 10 og har frist til midnatt. 310 Avinor-tilsette er tatt ut i det første streikeuttaket.

Ved ein streik blir desse lufthamnene nøydde til å stengje for ordinær trafikk frå fredag klokka 11: Alta, Bergen, Førde, Haugesund, Honningsvåg, Leknes, Rørvik, Sandnessjøen og Ålesund.

– Nær 30.000 passasjerar skal reise til eller frå desse lufthamnene fredag, og det er stor trafikk gjennom helga òg. For Bergen lufthamn Flesland er denne helga den travlaste i år ettersom skuleferien startar 17. juni, seier kommunikasjonssjef i Avinor, Gurli Høeg Ulverud.

Fly i samband med ambulanse- og redningsarbeid går fri av ein eventuell streik.

Stridskjernen er pensjon, ifølgje forhandlingsleiar Lise Olsen i LO Stat, som trekkjer fram at Avinor krev at arbeidsgivar einsidig kan endre pensjonsordningane – utan at dei tilsette veit kva innhaldet i pensjonsordninga blir.

– Denne saka kunne vore løyst lenge før mekling. Vi har sagt vi er villige til å forhandle om pensjon, men vi må vite kva vi skal forhandle om. Avinor held likevel fast ved eit urimeleg krav. Avinor kan ikkje berre stryke tilsetterettar når de føler for det, seier Olsen. (©NPK)