Nkom varslar nye breibandsplikter for Telenor

I vedtaka blir Telenor pålagt å halde oppe tilgangen til koparnettet i ein overgangsperiode, og å gi grossistkundane tilgang til fast mobilt breiband.

Tiltaka skal styrkje konkurransen med føreseielege rammevilkår for grossistkundar og gi sluttkundar fleire leverandørar å velje mellom.

– Vi meiner Telenors gjennomføringsplan for nedlegging av koparaksessnettet kan føre til varig svekking av konkurransen i strid med føremåla til e-komlova, seier Hans Jørgen Enger, som leiar konkurranseavdelinga i Nasjonal kommunikasjonsmyndigheit (Nkom).

For å sikre Telenors grossistkundar føreseielege rammevilkår har Nkom derfor sendt Esa utkast til vedtak som vil påleggje Telenor å halde oppe grossisttilgang til koparnettet i inntil fem år frå vedtakstidspunktet.

Telenor kunngjorde i slutten av januar i fjor at selskapet har vedteke å leggje ned koparnettet innan utgangen av 2022 og erstatte dette med fiber- og mobilbaserte løysingar.

Etter Nkoms vurdering er tidsplanen Telenor har for å leggje ned koparnettet, for kort.

Grossistkundane til Telenor har heller ikkje fått tilstrekkeleg informasjon eller moglegheit til å ta vare på interessene sine, til dømes ved å ha moglegheit til å tilby sluttkundane sine erstatningsprodukt ved bortfall av koparnettet, meiner Nkom.

Esa har frist på éin månad til å kommentere utkasta til vedtak. Etter at Esa har gitt tilbakemeldinga si, vil Nkom i størst mogleg grad ta omsyn til kommentarane derifrå og gjere endeleg vedtak.

(©NPK)

Foto: Gorm Kallestad / NTB scanpix