Nordmann mistenkt for dating-svindel i millionklassen

Den 30 år gamle mannen vart onsdag arrestert i Sverige etter eit samarbeid mellom svensk og norsk politi. I Skien tingrett fekk politiet medhald i kravet om fire vekers varetektsfengsling, ifølgje Aftenposten.

Mannen skal ha fått kvinnene til å låne han pengar, og i alt sju personar har til no meldt han til politiet. Politiet undersøkjer om det kan vere fleire kvinner som har blitt lurte.

– Til saman gjeld dei sju tilfella bedrageri for fem millionar kroner, opplyser politiadvokat Gunstein Bjørgum i Telemark politidistrikt til avisa.

Politiet kallar dette for «Sukker-saka» fordi 30-åringen innleidde relasjonar til kvinnene på nettdatingsida Sukker.no. Saka har ikkje vore omtalt i media tidlegare.

I tillegg er mannen sikta for eit tilfelle av truslar og eit tilfelle av skremmande åtferd. Dei fornærma kvinnene er busette i Oslo, Telemark, Østfold og fleire stader på Vestlandet. 30-åringen er dømt for liknande tilfelle tidlegare. (©NPK)