Noreg gir 660 millionar kroner til FNs menneskerettsarbeid
Noreg har gjort ein fireårig avtale med FNs høgkommissær for menneskerettar (UNHCR) om å gi ei støtte på til saman 660 millionar norske kroner.
Noreg har gjort ein fireårig avtale med FNs høgkommissær for menneskerettar (UNHCR) om å gi ei støtte på til saman 660 millionar norske kroner.
Pengane skal gå til å styrke FNs arbeid for å forsvare og fremme menneskerettane både i enkeltland og internasjonalt, skriv utanriksdepartementet i ein pressemelding.
- Menneskerettane er under press i verda i dag. FNs høgkommissær for menneskerettar er leiande i arbeidet i det internasjonale samfunnet for menneskerettar og har behov for sterk og tydeleg støtte i sitt arbeid. At vi no inngår ein fireårig avtale gir føreseielegheit for FN i deira arbeid, seier utanriksminister Ine Eriksen Søreide (H).
Gjennom den nye samarbeidsavtalen vil Noreg støtte FNs høgkommissær med 165 millionar kroner årleg i perioden 2018-2021.
I tillegg til innsats i land og regionar, som eksempelvis Colombia og Sahel, gir Noreg øyremerkt støtte blant anna til innsats for å beskytte ytringsfridom, tru- og livssynsfridom og menneskerettsforsvararar på landsnivå.
- Det er klare samanhengar mellom menneskerettar og andre utfordringar som det internasjonale samfunnet må løyse. Om vi ikkje lykkast med å ta vare på menneskerettane vil vi neppe lykkast i innsatsen vi gjer for berekraftig utvikling og fred, seier Søreide.
(©NPK)
Utanriksminister Ine Eriksen Søreide (H) er i New York for å ta del på FNs hovudforsamling. Foto: Pontus Höök / NTB scanpix.