Noreg håpar på sterk og sjølvstendig FN-sjef

Saman med seks andre land, Colombia. Etiopia, Ghana, Indonesia, Jordan og Mexico, har Noreg utarbeidd anbefalingar til FNs neste generalsekretær. Målet er å påverke FN-sjefens agenda og gjere FN meir relevant for å løyse globale utfordringar.

– Viktigare enn kven som blir ny generalsekretær, er kva den neste generalsekretæren bør gjere. Derfor har Noreg teke initiativ til å utvikle fleire forslag til korleis ein ny FN-sjef kan styrke FN, seier Brende i ein e-post frå UD.

Forslaga, som blir omtala som FN-70-prosjektet, blei lagt fram på eit møte i New York torsdag. I tillegg er dei omtalte i ein kronikk i Aftenposten.

Ifølgje Brende bør den neste FN-sjefen vere både verdas beste diplomat og aktivist. Han eller ho bør engasjere seg for å førebyggje konfliktar, sørgje for at verda innfrir forpliktingane sine når det gjeld både klima og FNs berekraftsmål, vere ein forsvarar for menneskerettar og også ein talsperson for dei fordrivne i verda.

– Når FNs medlemsland stridast, er det avgjerande at vi har ein sterk og klar FN-leiar. FN70-prosjektet set dette på dagsordenen, skriv Brende i kronikken. (©NPK)