Norsk EM-gull i paradressurridning ved Dokkan

Jens-Lasse Dokkan og hesten Aladdin sikra norsk EM-gull i paradressurridning under meisterskapen i Rotterdam onsdag.

Dokkan fekk akkurat same poengsum som italienske Sara Morganti på Royal Delight, men gjekk føre som følgje av høgare uttelling i kunstnarisk inntrykk blant fem dommarar.

Dokkan og Aladdin var femte startande av dei 17 ekvipasjane i paradressurridning grad 1, medan Morganti/Royal Delight var tredje sist.

Rihards Snikus frå Latvia på King of the Dance tok bronsen.

Så langt i EM har det vorte gull til Tyskland (føre Nederland og Sverige) i dressurridning for lag, medan det vart austerriksk siger ved Pepo Puch i paradressurridning grad 2 og dansk siger ved Tobias Thorning Jørgensen i paradressurridning grad 3.

Dokkan var ikkje einaste norske utøvar i aksjon i Rotterdam onsdag. Då vart òg EM i sprangridning innleidd. Peder Fredricson frå Sverige var best i den første runden, medan dei norske enda eit stykke ned på lista.

Johan-Sebastian Gulliksen på Exit of Ice Z vart nummer 38, Hege C. Tidemandsen på Carvis 48, Pål Flam på Skjerabergs Larkin 55 og Geir Gulliksen på Gin Chin van het Lindenhof nummer 58.

Tyskland leier lagkonkurransen, medan Noreg er på 13.-plass.

Det var 70 ekvipasjar med i sprangridning, som held på heilt fram til den individuelle vinnaren er kåra søndag. Lagkonkurransen blir avslutta fredag.

(©NPK)

Jens-Lasse Dokkan (til h.) vann EM-gull i paradressurridning onsdag. Her møter han prinsesse Märtha Louise i samband med ei utgåve av Oslo Horse Show. Foto: Gorm Kallestad / NTB scanpix