Ny gullstøvel til Messi

Barcelonas Lionel Messi fekk onsdag den sjette gullstøvelen sin som toppskårar i alle europeiske ligaer.

Det er tredje året på rad at Messi får prisen, og sjette gong totalt. Argentinaren scora 36 mål for Barcelona sist sesong, tre fleire enn den næraste utfordraren, PSG-spissen Kylian Mbappé.

Sønene til Messi, Thiago og Mateo, overrekte faren trofeet saman med Antonella Rocuzzo, kona til Messi. Fleire lagkameratar var òg til stades, mellom anna Luis Suárez og Jordi Alba.

- Utan laget mitt ville eg aldri ha vunne prisen ein einaste gong, sa Messi i takketalen sin.

Messi har no vunne gullstøvelen to gonger fleire enn den argaste rivalen sin Cristiano Ronaldo.

(©NPK)

Barcelonas Lionel Messi fekk onsdag tildelt gullstøvelen. Foto: Joan Monfort / AP / NTB scanpix