Ny TV-siger for Lindmo - nedgang for Skavlan
NRKs Anne Lindmo har fått ei knallopning på TV-hausten. Fredag hadde ho 736.000 sjåarar, nesten dobbelt så mange som TV 2-rivalen Fredrik Skavlan.
736.000 sjåarar er ein auke frå førre veke då 620.000 fekk med seg TV-programmet. Fredag hadde programmet ein del på 50,5 prosent, skriv Kampanje.
NRK har fleire grunnar til å juble etter TV-tala i helga. Nytt på nytt hadde 1.035.000 sjåarar og bikka ein million sjåarar for første gong i haust. Delen var på 65,8 prosent.
Førre veke fekk 440.000 sjåarar med seg det første programmet til Skavlan i haust. 55.000 sjåarar har forsvunne sidan den gongen; fredag var det 385.000 som så Skavlan på TV 2. Kanalen hadde ein sjåardel på 25,2 prosent.
(©NPK)
Anne Lindmo har fått ein fin start på TV-hausten. Her får ho prisen for Årets TV-namn under Kjendisgallaen 2016. Foto: Jon Olav Nesvold / NTB scanpix