Nybø vil la føretak halde fram med digitale møte

Det siste året har næringslivet hatt større moglegheit til å halde digitale møte. Næringsministeren vil gjere den mellombelse lova permanent.

I utgangspunktet må norske føretak halde fysiske møte, men det vart gjort unntak under koronapandemien.

Det har vore ei mellombels lov som gjer at føretaka kan halde elektroniske møte. Den opphøyrer 1. juni 2021, og næringsminister Iselin Nybø (V) vil at ho skal bli permanent.

Forslaget til næringsministeren betyr at føretaka sjølve kan velje om dei ønskjer å halde fysiske eller digitale styremøte, generalforsamlingar, årsmøte og selskapsmøte, skriv Nærings- og fiskeridepartementet i ei pressemelding.

Lovforslaget vart lagt fram for Stortinget fredag, og det blir teke sikte på at dei nye reglane skal tre i kraft i juni.

(©NPK)