Testar tyfonar i dag
Onsdag 12. januar testar Sivilforsvaret signalet «Viktig melding – søk informasjon» i alle kommunar der det er montert varslingsanlegg.
Publisert: 12.01.2022 kl 10:00
Sivilforsvaret testar varslingsanlegga fast i januar og juni kvart år. Signalet vert sendt i tre seriar med eitt minutts opphald mellom seriane. Signalet tyder at du skal søke informasjon i til dømes radio, tv, aviser, på myndigheitene sine nettsider og i sosiale medium.
Både i fred og krig
Rundt om i landet er det kring 1.250 tyfonar som skal varsle befolkninga ved akutt fare. Varslingsanlegga kan bli brukt både i fred og krig.
– I fredstid kan varslingsanlegga blant anna brukast ved industriulykker med utslepp av giftige eller farlege stoff. Medan i krig kan anlegga brukast ved fare for angrep, seier direktør Elisabeth S. Aarsæther i DSB, i ei pressemelding.