Opptur på Oslo Børs – steg 1 prosent

Oppgang for fleire av dei store selskapa bidrog til at hovudindeksen på Oslo Børs tysdag steig nær 1 prosent.

Hovudindeksen enda på 1.176,50 poeng tysdag – opp 0,96 prosent.

Tungvektarar på børsen bidrog til oppgangen. Av dei mest omsette selskapa steg Equinor 0,36 prosent, medan DNB og Aker BP steig høvesvis 0,37 og 2,43 prosent. Av dei ti mest omsette selskapa var det berre Telenor som enda dagen med raude tal (-0,37).

Ein av vinnarane tysdag var Rec Silicon, som steig 6,69 prosent etter nyheita om at dei har refinansiert eit milliardlån. Ifølgje E24 inngår silisiumprodusenten ein refinansieringsavtale med den koreanske banken KEB Hana Bank. Rec Silicon hadde eit obligasjonslån på 110 millionar dollar som stod til forfall i april. Dette er no refinansiert gjennom eit banklån.

Også oljeprisen steig tysdag. Eit fat nordsjøolje vart ved 17-tida omsett for 74,34 dollar, opp 0,8 prosent frå nivået i natt.

Då var det også positive trendar å spore også på dei tonegivande børsane i Europa. FTSE 100-indeksen i London låg opp 1,7 prosent. Den tyske DAX-indeksen låg 1,6 prosent i pluss, medan CAC 40-indeksen i Paris var opp 1,3 prosent.

(©NPK)

Oslo Børs enda tysdag i pluss. Foto: Beate Oma Dahle / NTB