Oslos byråd innfører pensjon frå første krone
Byrådet i Oslo har vedtatt at alle medarbeidarar i Oslo kommune får pensjon frå første krone frå og med 2021.
Byrådet skal offentleggjere avgjerda torsdag. Byrådsleiar Raymond Johansen slår fast at pensjon frå første krone bør bli den nye normalen i norsk arbeidsliv.
- Folk skal ha ein pensjon å leve av. Eg er veldig glad for at vi kan gi låglønte og deltidsmedarbeidarar ei betre pensjonsordning. Dette handlar om rettferd og likebehandling, seier han.
Tilsette i kommunen tener i dag først pensjon for 20-prosentstillingar. I tillegg må årsinntekta vere høgare enn 1G, altså cirka 100.000 kroner. Den same ordninga gjeld i store delar av privat sektor.
Førre veke feira dei fagorganiserte ein pensjonssiger i Rikslønnsnemnda, som avgjorde at sjukehustilsette som jobbar under 20 prosent, får rett til pensjonsopptening. Dette var det store stridsspørsmålet under den tre veker lange sjukehusstreiken i sommar.
(©NPK)
Illustrasjonsfoto: Vidar Ruud / NTB scanpix