Over 5.400 koronadødsfall i Russland i juni
I juni døydde 5.400 menneske med covid-19 i Russland, over 1.000 fleire enn tidlegare rapporterte, opplyser statistikkstyresmaktene i landet.
Russlands offisielle dødsrate er langt lågare enn i andre land med samanliknbare smittetal. Det har fått kritikarar til å skulde styresmaktene for å underrapportere dødstala for å få krisa til å verke mindre enn ho er.
Ifølgje den daglege rapporteringa til helsestyresmaktene døydde 4.499 koronasmitta mellom 2. juni og 1. juli. Statistikkbyrået Rosstat opplyser fredag at for 5.448 personar som døydde i juni, blir koronaviruset rekna som den viktigaste dødsårsaka.
I tillegg døydde 4.880 koronasmitta personar av andre sjukdommar.
(©NPK)
Ein helsearbeidar utfører ein koronatest på eit senter som er etablert på Vnukovo-flyplassen utanfor Moskva. Foto: Pavel Golovkin / AP / NTB scanpix