Pararoar døydde under trening i VM-anlegget

Ein kviterussisk pararoar drukna onsdag etter at båten hans kantra under trening i anlegget der VM i roing skal starte kommande helg.

33-åringen trena på Donau-elva i konkurranseanlegget i Ottensheim nær Linz. Ein redningsaksjon vart umiddelbart sett i gang då han kantra, men ein greidde ikkje å berge han.

Dykkarar fann kroppen hans under vatn tre timar seinare. Namnet til mannen er ikkje offentleggjort.

VM i Linz startar søndag. Norske Birgit Skarstein er blant dei store favorittane i pararoing.

(©NPK)