Mann funnen død under leiting etter hummarfiskar
Ein mann blei måndag funnen død i sjøen i området der ein hummarfiskar har vore sakna etter at ein sjark forliste i Bokn i Rogaland laurdag.
- Klokka 17.15 blei det gjort funn av ein mann i sjøen i nærleiken av båten. Pårørande er varsla. Det blir arbeidd med å ta vedkommande opp frå sjøen, opplyser Sørvest politidistrikt.
Den omkomne er truleg ein 47 år gammal mann som har vore sakna etter at ein sjark forliste i Årsvågen i Bokn kommune laurdag formiddag.
Måndag blei det sett i gang ytterlegare søk i området. Frivillige Organisasjoners Redningsfaglige Forum (FORF) stilte med to båtar til overflatesøk, mens Sola flyklubb søkte frå lufta.
Søndag blei leitinga flytta til strandlinja, og politiet fekk mellom anna bistand av frivillige frå Røde Kors og Norsk Folkehjelp. Dykkarar frå brannvesenet har også bidrege.
Det var like etter klokka 11 laurdag at Hovudredningssentralen Sør-Noreg fekk melding om at ein sjark med to menn om bord var sakna sør for Vestre Bokn søraust for Karmøy i Rogaland. Ein 51 år gammal mann blei laurdag ettermiddag henta livlaus opp av vatnet og seinare erklært død på Haukeland universitetssjukehus i Bergen.
Det blir rekna med at dei to mennene reiste ut laurdag morgon, men ingen hadde vore i kontakt med dei sidan fredag. Det kan ha teke fleire timar frå sjarken fekk problem til politi og redningspersonell blei varsla.
(©NPK)
Eit redningshelikopter og fartøy lette laurdag etter hummarfiskaren som blei meldt sakna i Arsvågen i Rogaland. Foto: Tor Andre Johannessen / NTB scanpix