Presidenten på Maldivane erkjenner valnederlag
President Abdulla Yameen erkjenner at opposisjonskandidat Ibrahim Mohamed Solih har vunne presidentvalet på Maldivane.
- Eg veit at eg må gå av no, sa Yameen på statleg fjernsyn måndag.
Yameen sa han godtar valresultatet og at han erkjenner nederlaget.
- Eg vil legge til rette for smidig overgang, sa han i sin TV-tale.
Førebelse resultat offentleggjort av valkommisjonen viser at Yameen fekk 41,7 prosent av stemmene, langt bak den einaste motkandidaten, Ibrahim Mohamed Solih, som fekk 58,3 prosent.
Solih erklærte seg som vinnar av valet allereie fleire timar før resultatet var klart.
Presidentvalet har hausta kraftig internasjonal kritikk, blant anna fordi opposisjonen og uavhengige medium var blitt pålagt restriksjonar. Yameen og Solih var dessutan dei einaste kandidatane som stilte til val, fordi dei andre utfordrarane enten er i fengsel eller bur i eksil.
Yameen brukte sin første presidentperiode til å konsolidere makt og fengsle opposisjonsmedlemmer, inkludert sin eigen halvbror, ein tidlegare president og to høgsterettsdommarar.
88 prosent av dei 262.000 røysteføre stemte ved valet søndag.
(©NPK)
Oppteljinga viser at Ibrahim Mohamed Solih er valt til ny president. Foto: Eranga Jayawardena / AP / NTB scanpix
Opposisjonskandidat Ibrahim Mohamed Solih er valt til ny president på Maldivane. Foto: AP / NTB scanpix