Pride-arrangement forbode i tyrkiske byar

Det er femte året på rad at Pride-arrangement blir forbode i Istanbul. Også i turistbyane Antalya og Izmir ved Egeerhavet er det lagt ned forbod mot å markere den årlege feiringa til LHBTI-samfunnet.

- Desse diskriminerande avgjerdene er del av ein stadig større og stadig meir urovekkjande undertrykking av LHBTIs rettar i Tyrkia, seier Fotis Filippou, Amnesty Internationals visedirektør for Europa.

- Den same intoleransen som har ført til at Istanbul Pride March har vore forbode sidan 2015, spreier seg rundt i landet og fråtsar LHBTI-personar retten til å feire, legg han til.

LHBTI er ei samlenemning for lesbiske, homofile, biseksuelle, tranpersonar og interseksuelle.

Prideveka skulle ha starta i Istanbul måndag. Det har vore planlagt 70 arrangement fram til 30. juni, då det var meininga at ein pridemarsj skulle arrangerast på Taksimplassen i sentrum av Istanbul.

Men styresmaktene har avslått søknaden, og ein annan søknad om å få halde arrangementet i utkanten av byen er framleis under behandling.

I fjor brukte politiet tåregass for å spreie hundrevis av menneske som trassa forbodet og prøvde å gjennomføre marsjen.

(©NPK)

Igjen har tyrkiske styresmakter sagt nei til pridemarsj i Istanbul. Her er regnbogeflagget under Oslo Pride Parade i juni i fjor. Foto: Stian Lysberg Solum / NTB scanpix