PSG-presidenten frikjend i korrupsjonsrettssak
PSG-toppen Nasser al-Khelaifi og tidlegare FIFA-generalsekretær Jerome Valcke unngår begge fengselsstraff i rettssaka om kjøp av TV-rettar til fotball-VM.
Begge dei to fotballtoppane var tiltalte for medverknad til korrupsjon etter påstandar om at Valcke skulle ha fått hjelp av al-Khelaifi til å kjøpe ein luksusvilla på Sardinia. Dette skal ha skjedd samtidig som TV-selskapet BEIN Sports, der al-Khelaifi er styreleiar, forhandla om rettane til å vise fotball-VM i 2026 og 2030 i Nord-Afrika og Midtausten.
Avgjerda frå domstolen i sveitsiske Bellinzona kom fredag. Al-Khelaifi blir frikjent, medan Valcke blir dømd til 120 dagar med vilkårsbunde fengsel for eit sekundært tiltalepunkt.
I tillegg til å vere styreleiar i BEIN sports, er al-Khelaifi mellom anna president i fotballklubben Paris Saint-Germain, styreleiar i Qatar Sports Investments og president i Qatars tennisforbund.
(©NPK)
PSG- og medietoppen Nasser al-Khelaifi er frikjend i korrupsjonssaka i Sveits. Foto: Thibault Camus / AP / NTB