Putin kallar skuldingar om russiske dataangrep for latterlege
President Vladimir Putin avviser i eit intervju med amerikanske NBC skuldingar om at Russlands står bak dataangrep mot USA og kallar dei latterlege.
TV-intervjuet er gjort i forkant av toppmøtet på onsdag mellom Putin og USAs president Joe Biden i Genève.
Her seier Putin òg at han er open for ei fangeutveksling mellom Russland og USA, samtidig som han lovar at den fengsla opposisjonspolitikaren og Putin-kritikaren Aleksej Navalnyj ikkje kjem til å bli behandla noko dårlegare enn andre.
På spørsmål om Russland fører ein kyberkrig mot USA, svarer Putin:
– Kvar er bevisa? Det byrjar å bli latterleg. Vi har vorte skulda for alle moglege ting, valinnblanding, kyberangrep og så vidare, og så vidare, og ikkje ein einaste gong, ikkje på noko tidspunkt, tok dei seg bryet med å skaffe noka form for bevis, berre ugrunna skuldingar.
(©NPK)
President Vladimir Putin blir intervjua av NBC-journalisten Keir Simmons. Foto: NBC News via AP / NTB