Radiolyttinga på botnnivå

Berre rundt halvparten av befolkninga lytta til vanleg radio (FM, dab eller lokalradio), nettradio eller begge delar dagleg i 2018. Det er botnrekord.

Gjennomsnittleg lyttetid i befolkninga var på 1 time og 8 minutt, viser tal frå undersøkinga Norsk Mediebarometer, ifølgje Statistisk sentralbyrå (SSB).

- Dette er både den lågaste delen radiolyttarar og den lågaste lyttetida vi har målt dei åra undersøkinga har vore gjennomførte, seier Emma Castillo Schiro, som er ansvarleg for Norsk Mediebarometer 2018.

Tala viser at 71 prosent av befolkninga lytta til radio dagleg i 1991, før delen fall gradvis fram mot 2000 då han stabiliserte seg på mellom 54 og 60 prosent fram til 2016, då det byrja å gå nedover igjen.

38 prosent av befolkninga høyrde på DAB-radio dagleg i fjor. Det er ein auke frå 33 prosent året før. Mengda som har DAB-radio heime har auka frå 65 prosent i 2017 til 72 prosent i fjor. Så vidt over halvparten - 51 prosent - har DAB-radio i bilen.

NRK P1 er den største kanalen i landet når det gjeld talet på lyttarar, medan P4 er på andreplass. P3 og Radio Norge følgjer rett bak. NRK P1 åleine har ei lyttaroppslutning på 14 prosent, medan alle NRK-kanalane til saman har ei oppslutning på 27 prosent.

Mengda som høyrer på nærradio er 8 prosent, opp med 2 prosent frå 2017.

(©NPK)

Berre halvparten av befolkninga høyrde dagleg på radio i fjor. Det er nytt botnnivå.
Foto: Terje Bendiksby / NTB scanpix