Regjeringa med ny strategi for å verne Noreg mot terror

– I år er det ti år sidan terroren ramma oss 22. juli. Regjeringa har lagt stor vekt på arbeidet med beredskap gjennom desse åra, og vi har følgt opp alle av tilrådingane til 22. juli-kommisjonen, seier justis- og beredskapsminister Monica Mæland (H) i ei pressemelding.

22. juli-kommisjonen konkluderte i si tid mellom anna med at gjerningspersonen kunne vore stansa tidlegare.

– Sjølv om vi har følgt opp tilrådingane til 22. juli-kommisjonen, kan arbeidet med å førebyggje og handtere terror aldri slutte. Vi må halde fram med å vurdere nye behov og nye tiltak for å følgje utviklinga. Regjeringa har derfor utvikla ein ny nasjonal kontraterrorstrategi, seier Mæland.

Strategien peikar særleg på fire prioriterte grep: Gi PST og Etterretningstenesta eit lovverk som tettar gapa som har oppstått på grunn av teknologiutvikling, gi meir informasjon til aktørar som blir vurderte som potensielle terrormål, styrke det lokale samarbeidet mot terrorhendingar og styrke reintegrering til samfunnet blant radikaliserte eller allereie terrordømde personar.

(©NPK)

Regjeringa har utvikla ein ny nasjonal strategi som skal førebyggje og motverke terror, fortel justis- og beredskapsminister Monica Mæland (H). Foto: Stian Lysberg Solum / NTB