Riksrevisjonen: Alvorleg med manglande våpenkontroll

I sin årlege kontroll og revisjon av budsjettåret 2017 peikar revisjonen også på at bekymringsmeldingar på dette området ikkje blir fanga godt nok opp, og at nasjonalt våpenregister ikkje sikrar oppdaterte og korrekte opplysningar.

- Politidistrikta gjennomfører for få kontrollar av sivil oppbevaring hos våpeninnehavarar og forhandlarar til å ha grunnlag for å vurdere tilbakekalling av våpenkort og løyve, heiter det i rapporten, som blei lagt fram torsdag.

Systemet politiet har etablert for å fange opp bekymringsmeldingar om at våpeneigarar eller forhandlarar ikkje lenger er eigna til å ha skytevåpen, fungerer ikkje godt nok, ifølgje Riksrevisjonen.

- Politidirektoratets styring og kontroll av arbeidet i politidistrikta med våpensaker er mangelfull, og Justis- og beredskapsdepartementet har i etatsstyringa ikkje følgt opp at direktoratet har tilstrekkeleg styring og kontroll på dette området, heiter det.

Statsråden uttaler at departementet ser alvorleg på det som kjem fram i Riksrevisjonens rapport, og peikar på at funna gir eit svært godt grunnlag for forbetring av våpenforvaltinga til politiet.

(©NPK)

Det er alvorleg at politiet ikkje har oversikt over eit stort talet på våpen og for lite kontroll av oppbevaring hos sivile og forhandlarar, ifølgje Riksrevisjonen. Foto: Peter Talos / NTB scanpix