Salman Rushdie fordømmer Roald Dahl-endringar

Forfattaren Salman Rushdie kritiserer avgjerda om å fjerne ord som «tjukk» og «stygg» frå Roald Dahls bøker som absurd. Skammeleg, seier han.

Forlaget Puffin Books og Roald Dahl Story Company, som eig rettane til alle Dahls forteljingar, stadfestar at dei har fått såkalla sensitivitetslesarar til å gå gjennom verka og skrive om ord og formuleringar som kan oppfattast som støytande.

– Roald Dahl var ingen engel, men dette er absurd sensur. Puffin Books og Dahl-selskapet bør skamme seg, skriv Rushdie på Twitter.

Suzanne Nossel, som leier PEN America, seier ho er opprørt over kunngjeringa. Ho åtvarar om at makta til å endre på bøker raskt kan bli misbrukt, melder det britiske nyheitsbyrået PA.

Meldingane om endringane i Dahls bøker kom søndag og sende sjokkbølgjer blant dei mange som stifta kjennskap med bøkene i barndommen. Redaktør Laura Hackett i Sunday Times seier at ho skal behalde dei originale Dahl-bøkene sine, slik at barna hennar «kan nyte dei i sin fullstendige, ufyselege og fargerike prakt».

Gyldendal, forlaget som gir ut bøkene til Dahl i Noreg, seier verka også kjem til å bli endra her til lands.

– Gyldendal følgjer opp språklege oppdateringar, justeringar og modernisering i tråd med den linja som blir lagt av rettsforvaltaren Roald Dahl Story Company, skreiv kommunikasjonssjef Steffen Aagedal i Gyldendal i ein e-post til NTB søndag.

(©NPK)

Salman Rushdie kallar sensur av Roald Dahls barnebøker absurd. Foto: Evan Agostini / Invision / AP / NTB

Forlaget Puffin Books og Roald Dahl Story Company har bestemt at det dei meiner kan oppfattast som støytande ord i Roald Dahls barnebøker, skal fjernast. Arkivfoto:
Andrew Burton / AP / NTB