Polaris kjøper Fædrelandsvennen og dannar mediekonsern i sør

Det nye selskapet vil heite Polaris Media Agder AS, der Polaris Media vil eige 51 prosent, og eigarane av Agderposten Medier vil kontrollere dei resterande 49 prosentane, heiter det i ei pressemelding frå Polaris Media fredag morgon.

Konsernet vil bestå av dei tre regionale mediehusa Fædrelandsvennen (Kristiansand), Agderposten (Arendal) og Varden (Skien) og dei 6 lokale mediehusa Lister (Farsund), Lindesnes (Mandal), Søgne og Songdalen Budstikke, Vennesla Tidende, Lillesands-Posten og Grimstad Adressetidende.

170.000 lesarar

Dei ni mediehusa hadde i 2018 eit samla opplag på 107.000, 138.000 daglege lesarar digitalt og 170.000 daglege lesarar på papir.

- Agder er ein region i endring, med nært kommande fylkessamanslåing frå 1. januar 2020 og eit sterkt utbetra infrastruktur som har skapt auka mobilitet og handel internt i regionen, seier styreleiar Willem Sijthoff i Agderposten Medier.

Han opplyser at Polaris Media, Agderposten Medier og Schibsted over tid har arbeidd med sikte på å slå saman medieverksemdene.

Digital transformasjon

- Polaris Media ser fram til å jobbe saman med eigarane og leiing i Agderposten Medier for å utvikle desse mediehusene vidare, og bidra til å lykkast med den digitale transformasjonen, i samspel med resten av Polaris Media, og i eit strategisk samarbeid med Schibsted, seier konsernsjef Per Axel Koch i Polaris Media.

- «Timinga» er god. Vi har hatt det bra i Schibsted, men vil få det endå betre i Polaris-konsernet, seier sjefredaktør og administrerande direktør Eivind Ljøstad i Fædrelandsvennen til si eiga avis.

Handelen er gjord med atterhald om godkjenning frå Konkurransetilsynet. Endelege og bindande avtalar er venta å bli inngått i oktober eller tidleg november.

(©NPK)

Fædrelandsvennen held til på torget i Kristiansand. Arkivfoto: Tor Erik Schrøder / NTB scanpix