Skademeldingane tikkar inn etter flaumen
Telefonpågangen har vore stor hos forsikringsselskapa etter flaumen i Sør-Noreg. Mange huseigarar fortel om vatn som har trengt inn i bygningar og i kjellarar.
Tryg Forsikring hadde i 12-tida måndag fått til saman 57 skademeldingar etter nedbøren og flaumen i Sør-Noreg i helga. Den estimert skadesummen er på vel 6 millionar kroner.
- Så langt har vi registrert langt fleire skadar på Vestlandet enn for flaumen i Gudbrandsdalen. Så veit vi av erfaring at det vil koma langt fleire skademeldingar utover veka, når skadeomfanget blir kartlagt betre, seier kommunikasjonsrådgjevar Torbjørn Brandeggen i Tryg Forsikring.
Gjensidige forsikring hadde midt på dagen måndag fått inn 50 skademeldingar. Her har likevel rundt halvparten av meldingane kome frå Skjåk i Gudbrandsdalen.
- Dei aller fleste skadane kjem av vatn som har trengt inn i bygningar og kjellarar. Dessutan har vi fått melding om nokre få bilar som har fått problem i vassmassane, seier kommunikasjonssjef Bjarne Rysstad.
Frende Forsikring hadde måndag ettermiddag fått inn mellom 50 og 60 skademeldingar, mens If fortel om i overkant av 40. Alle forsikringsselskapa ser for seg fleire dagar der mange skademeldingar blir melde inn.
- Det er mange har vore evakuerte, og vi reknar med at det vil koma fleire skademeldingar når dei kjem heim att dei neste dagane, seier informasjonssjef Sigmund Clementz i If.
Noregs-, vassdrags- og energidirektorat (NVE) opplyste måndag ettermiddag at flaumen hadde nådd toppen og var på retur.
(©NPK)
Mange hus er ramma av flaumen i Bismo i Skjåk kommune i Oppland. Mildvêr og mykje regn har gjeve vårflaumtilstander på seinhausten. Foto: Ørn Borgen / NTB scanpix