Slankeklinikk i Aust-Agder vil starte folkehøgskule

Den nye Folkehøgskolen helse skal ligge same stad som den allereie etablerte slankeklinikken på Evje og blir den første skulen i sitt slag i landet, melder NRK.

– No har vi jobba med barn og unge og sjukleg overvekt sidan 2008, og vi har jo erfart at det er eit hol i tilbodet til dei som slit med overvekt. Det finst ikkje denne typen tilbod i folkehøgskuleregisteret i dag, så dette er ein nisjeskule der vi håpar å kunne hjelpe elevar til å bli bidragsytarar i samfunnet i staden for å gå på Nav, seier dagleg leiar Alf Tore Moen ved klinikken.

Evjeklinikken samarbeider med Helse sør-aust og er ein del av spesialisthelsetenesta. Den nye skulen er allereie godkjent av Folkehøgskulerådet. Planane blir også støtta av politikarar både lokalt og på Stortinget, i tillegg til Universitetet i Agder, KS Agder og Landsforeininga for overvektige.

Dersom skulen får det nødvendige statleg tilskotet, vil den starte opp neste haust.

– Viss vi ser til Danmark er det fleire spesialskular og folkehøgskular for akkurat dette, så at det er eit behov i Noreg, er eg ikkje i tvil om, seier Moen. (©NPK)