Smitteutbrot blant studentar i Bergen etter festar i helga
Fleire studentar i Bergen er smitta av korona etter fleire sosiale samankomstar i helga.
Torsdag vart det meldt om 46 nye smittetilfelle i Bergen. Halvparten av dei smitta er mellom 20 og 29 år.
Same dag melder Høgskulen på Vestlandet at fleire av studentane deira i Bergen er stadfesta smitta av koronaviruset, ifølgje NRK.
– Det er smitteutbrot i samanheng med ulike sosiale samankomstar i Bergen i helga som var. Fleire studentar er sette i karantene, og mange har testa seg, seier rektor Gunnar Yttri.
Då kommunen måndag forlengde dei strenge smitteverntiltaka i Bergen, kom helsebyråd Beate Husa (KrF) med kraftig kritikk etter fleire store utandørsfestar gjennom helga.
– Vi er kjende med at det var personar med smitte på utandørsfest i Nygårdsparken i helga som var, seier Husa til NRK.
(©NPK)