Stefaren til Johanne Zhangjia Ihle-Hansen får ikkje bistandsadvokat
Faren til draps- og terrorsikta Philip Manshaus - stefaren til jenta 21-åringen er sikta for å ha drepe - får ikkje utnemnt bistandsadvokat.
Det har Asker og Bærum tingrett vedtatt etter at advokat Vibeke Hein Bæra vart attrådd utnemnt som bistandsadvokat, skriv Budstikka.
Philip Manshaus (21) er sikta for å ha drepe si 17 år gamle stesøster Johanne Zhangjia Ihle-Hansen før han drog vidare til Al-Noor-moskeen i Bærum for å gjere seg skuldig i det politiet meiner er ei terrorhandling. Stesøstera si mor har fått utnemnt Elisabeth Hagen, medan stefaren hennar - Manshaus' far - bad om å få Bæra utnemnt som bistandsadvokaten sin.
Asker og Bærum tingrett er ikkje i tvil om at stefaren kan ha behov for juridisk hjelp i den ekstraordinære situasjonen som har oppstått. Men det er ikkje nok:
- Som stefar har han ikkje «foreldreansvar» og er heller ikkje «etterlaten» i forstanden til lova. Han fell ikkje inn under ordlyden til lova, og det faktumet at han i noka grad er nær omgrepet til lova er ikkje tilstrekkeleg til at bistandsadvokat skal nemnast opp, heiter det i grunngivinga til retten.
(©NPK)
Stefaren til Johanne Zhangjia Ihle-Hansen bad om å få utnemnt advokat Vibeke Hein Bæra som bistandsadvokat. Foto: Terje Pedersen / NTB scanpix