Stoltenberg: Jobbar framleis for Russland-møte

– Vi planlegg å ha eit møte i Nato-Russland-rådet like etter toppmøtet vårt i Warszawa. Nøyaktig tidspunkt og dagsorden er ikkje bestemt enno, seier Stoltenberg til pressen i Brussel.

Han har tidlegare gjort det klart at alliansen jobba for eit møte med russarane før NATO-toppmøtet i den polske hovudstaden fredag og laurdag. Men det har ikkje vore mogleg å bli samd med Russland om tidspunkt og dagsorden tidsnok.

– Det spelar ikkje så stor rolle om det skjer like før eller like etter toppmøtet, det viktige er at det finn stad. Nato-Russland-rådet er eit nyttig instrument, seier Stoltenberg.

Forholdet mellom Nato og Russland er framleis iskaldt. Det såkalla Nato-Russland-rådet heldt sitt første møte på nesten to år i april, og konklusjonen då var at partane framleis står langt frå kvarandre. (©NPK)